Su Cantu a Tenore

Su cantu a tenore est una pràtica poètica-musicale difùndia in su tzentru-nord de sa Sardigna. Est unu cantu polivocale de bator partes: bassu, contra, boghe e mesu boghe. Su chi distinghet su “tenore” est sa presèntzia de sa boghes guturales de bassu e contra, acordadas intre issas in intervallu de cuinta, chi lu faghent èssere unu cantu ùnicu e inimitabile. Sa boghe est su solista de su grupu e intonat su cantu, s’àteras partes lu sighint ina acòrdiu, acumpangende su cantu suo cun sonos guturales. Si nde boghamus calicunu cantu ispetzìficu, in sa majoria de sos casos sa boghe est finas s’ùnica a cantare su testu verbale, intames chi sos àteros cantores pronùntziant sìllabas nonsense bortende sa boghe insoro casi in istrumentos musicales pro otènnere unu acòrdiu de nodas e de timbros. Cun su faeddu Tenore (o puru cuncordu, cussertu, cuntratu o cunsonu, a segunda de sas chistionadas locales) si nòmenant sos bator cantores, ma su faeddu podet èssere impreadu finas solu pro sos tres de s’acumpangiamentu guturale. Su faeddu non currispundet tando a s’italianu “tenore”, chi est impreadu pro unu cantore ebbia chi cantat cun unu registru vocale pretzisu; su faeddu sardu est unu nòmene colletivu de su grupu de cantores e podet èssere bortadu cun “coro”, pro ite est una genia particulare de coro.

Su cantu a tenore faghet parte de su mundu de sa traditzione orale e est s’istrumentu prus de importu pro s’intepretatzione in mùsica de sa poesia in limba sarda: sa boghe sèberat sos testos de cantare intre cussu imparados a manera orale o puru pighende dae sa poesia orale e iscrita, l’intèrpretat a manera semper originale impreende sos cànones diferentes chi sa traditzione at fraigadu in annos. In base a sas formas mètricas de sas poesias ant a propònnere a boghe ‘e note, a sa sèria, a sa lestra, a boghe ‘e ballu, a mutos o a gosos (cando sunt testos religiosos), o in àteras modalidades chi apartenint a sas comunidades. Una de sas carateristicas de su cantu a tenore sardu est ca in onni bidda tenet unu piessìnnios diferentes chi si narant “moda” chi distinghet sos elementos de identidade de onni logu. Mancari chi siat una realidade bastante omogènea, siat dae su puntu de vista musicale chi culturale, sas caraterìsticas locales rapresentant una richesa manna de espressiones chi tenent valore mannu siat pro sos cantores siat pro sas comunidades matessi: Sas caraterìsticas de sas modas podent pertocare genias diferentes de cantos, sas istruturas etotu, partes melòdicas e tìmbros de sas partes (comente pro esempru sa possibilidade de impreare o nono su sonu guturale in tzertas traditziones o cantos), gasi comente sas funtziones chi tenet su cantu.

Amparare su cantu a tenore cheret nàrrere a salvare sas modas de sas biddas in ue sa traditzione est presente e bia. Dae custos cunsideros, cumpartzidas dae sos cantores, benit su nòmene de custu progetu de tutela, nomenadu MODAS.

Casi a a fàghere de contrapesu a sas diferèntzias istilìsticas de sas modas locales, su cantu a tenore non impreat (si non a manera rara) sos dialetos locales, ma una limba comuna, sa limba de sa poesia sarda de su tzentru nord de sa Sardigna, “su logudoresu”.

Su cantu a tenore faghet parte de sa vida de sas comunidades e nde acumpàngiat sos ritosm cusso prus pagu formales e finas cusso prus de importu e organizados; tenet funtziones meda in intro de sas comunidades chi lu pràticant. Intre custas e de importu a ammentare s’interpretatzione de sa poesia locale e sarda, s’acumpangiamentu de sas garas de poesia a bolu, s’acumpangiamentu de sas dantzas, sas pregadorias in sos ritos paralitùrgicos de sas festas de sos santos o, in tzertas biddas, de sa Chida Santa e finas in su cantu de amores e in sas serenadas ( mancari chi custa funtzione siat isparende).

Sos cuntestose sos logos in ue su cantu a tenore si esprimet sunt a un’ala cussos traditzionales de sos atòbios de festa e sas chenas intre amigos, su tzilleri, sos magasinos, sas carreras istrintas de sos tzentros istòricos, sas partzas in ue sos pitzinnos s’atòbiant, sas festas de bidda e sas de sos santos in su sartu, sos ritos de festas de santos e, in tzertas biddas, sas crèsias matessi, sas sagrestias, sos inghìrios de sa Chida Santa; a s’àteru los agatamus in logos noos comente sos palcos de sas festas e in sas sagras, sas rassinnas organizadas dae sos cantores matessi, sas provas de grupos organizados, sos cortiles de sas iscolas, sas istatziones de postale in ue s’atòbiant sos istudentes, sas radio e sas televisiones, chi cumbidant tenores prus o pagu connotos.

Sa cultura musicale de su cantu a tenore s’est isvilupada e est istata tramandada pro traditziones orale, comente espressione poètica e musicale de sa cultura de su pastoriu de sa Sardigna, nomenada comente "Pastoralismo", e fiat difùndia in territòrius ampros de s’ìsula. In su sèculu passadu, comente est acuntèssiu in totu su mundu a sas culturas locales e a s’in prus in su territòriu europeu, sa cultura de su pastoriu e de su cantu a tenore est istada ismenguada pro more de sa rivolutzione tecnològica econòmica, sotziale e culturale chi at caraterizadu su sèculu. S’àrea chi at mustradu de pòdere mantènnere mègius sas pràticas culturales e sotziales de su pastoralismu est sa de s’ìsula, àrea in ue su pastoriu est ancora meda praticadu e ancora oe rèdditu de importu pro comunidades intreas. S’àrea de difusione de su cantu a tenore est sa matessi e a custas si atzunghent sas de su nord de Sardigna.

Su cambiamentu econòmicu e de s’istrutura sotziale de sas biddas de su tzentru de sa Sardigna at fatu a manera chi oe sos cantores bèngiant dae totu sas categorias sotziales chi bi sunt in sa comunidade, dae su pastore a su dutore, dae s’operaiu a su professore, dae s’artesanu a s’impiegadu, a s’istudente. Pro bona sorte intre sos cantores prus presentes, sos chi càpitat de pòdere iscurtare, bi sunt meda giovanos e fintzas pitzinnos e custu faghet bene isperare pro su bene de su cantu a tenore.