Su censimentu e sa retza de su cantu a tenore
In custa setzione de su situ bi sunt regortas sas informatziones chi pertenent a sas duas fainas de fundu de su progetu Modas, su censimentu de su bene, un’iscumproada ampra a tales de connòschere dae unu ghetu cuantitativu, e non petzi gasi, sa situatzione de oe in die de su cantu a tenore, e sa creatzione de una retza regionale de cantadores, de cuncordos, de assòtzios e de entes locales pro favorèssere un’arresonu chi nche giugat a creare progetos acapiados a su mundu de su cantu a prus boghes de traditzione orale de Sardigna, in una mirada de inclusione e networking intre de sas realidades locales.
Una de sas fainas prevìdidas dae su progetu MODAS fiat cussa de su censimentu de su bene, est a nàrrere a fàghere una iscumproada ampra a tales de connòschere dae unu ghetu cuantitativu, e non petzi gasi, sa situatzione de oe in die de su cantu a tenore. In antis de totu tocat de pònnere a craru chi sa pràtica de su cantu a tenore tenet piessinnos totu suos chi si depent pònnere in contu a primìtzios. Su traballu de iscumproa s’est fatu, gosi, tenende in contu de sas realidades diferentes e boghende a campu sas diferèntzias e sos piessinnos locales e territoriales. Su còmpitu de fàghere su censimentu est istadu intregadu a duos assòtzios mannos de sos cantadores chi s’afainant in s’ìsula: Associazione Tenores Sardegna e Associazione Boches a Tenore.
Sos assòtzios ant chircadu sa collaboratzione de duos etnomusicòlogos, Luigi Oliva e Sebastiano Pilosu, pro su coordinamentu de sas atividades, pro sa regorta de sos datos e pro s’organizatzione e presentatzione imbenientes. In cadauna de sas comunidades ant agatadu, intre de sos cantadores prus ativos, unos cantos referentes chi ant tentu unu ruolu de importu in su de si relatare tra chircadores e sa comunidade locale. In pràtica a su traballu de su censimentu ant collaboradu a su mancu unos 100 cantadores de belle ateretantas biddas sardas. In prus s’est ammaniadu una genia de cuestionàriu de dare a sos cantadores a unu a unu, e in teoria a totus, ma prus o mancu a unu nùmeru bastante mannu e de significu de cantadores. Su cuestionàriu est istadu implementadu dae unu ghetu informàticu, pro mèdiu de Mòdulos de Google, gosi chi esseret istadu inviadu sena istrobbos a cadaunu de sos cantadores cun WathsApp o e-mail (non s’est pòdidu publicare in sos social-media a tales de nde istransire cumpilatziones no agradèssidas dae banda de àtere). Unu datu seguru est chi a cumpilare su cuestionàriu sunt istados petzi sos cantadores, sos nùmenes difatis sunt totus presentes in su database de sos cantadores censidos. Sa durada de s’iscumproa diat èssere istada prus lestra e su traballu galu prus a finu si aeremus pòdidu traballare in cunditziones normales, ma a dolu mannu, cando fiat pro inghitzare totu su traballu, est arribada s’epidemia de Covid-19 chi at istrobbadu meda cajonende retardos e dificultades mannas a cada operadore.
Leadu in cunsideru chi totu sos operadores chi b’ant traballadu e prus a notu sos duos etnomusicòlogos, connoschiant giai su mundu de su cantu a tenore, sa mannària e su nùmeru de sas comunidades interessadas, s’est mòidu dae sas comunidades connotas a manera istòrica e illarghiende manu a manu su campu de iscumproa a sas àteras comunidades sardas. S’est seberadu de non pònnere perunu filtru de comintzu pro buscare sos cantadores, pro esempru: calidade de su cantu, cantu in cuntesto ufitziales o pùblicos, publicatzione de discos, emissione guturale o nono, traballu de su cantadore, edade anagràfica, etc. Cuasta discriminantes a bias non tenent su rechisidu de s’ogetividade e àteras bortas diant èssere istadas valutatziones e classificatziones arbitràrias (fintzas si sugetivas) chi aerent escluidu paritzos cantadores chi intamas in sas comunidades issoro sunt protagonistas de balia de su cantu. De su restu custos piessinnos o discriminantes sunt pro de beras una parte de sas cosas làdinas de censire e istudiare, e duncas s’iscumproada at pertocadu sa totalidade de sos cantadores sardos.
Est in pràtica belle sa de tres partes de sos comunes sardos, isparghinados pro su prus in su centru-nord de s’ìsula, mescamente in sa provìntzia de Nùgoro.
Custu nùmeru ìndicat sa totalidade de sas biddas in ue bi sunt cantadores a tenore. Non pro fortza sunt biddas chi ant chistidu sa moda locale. A bortas sunt biddas ue sa pràtica de su cantu a tenore est pagu prus o mancu reghente e su nùmeru de sos cantadores est minore.
Custu datu est de cunsiderare prus bassu a su nùmeru reale de sos cantadores, fintzas si si nde acòstiat meda. Si si ponet in contu de su piessinnu populare e ispontàneu de sa pràtica de su cantu, si si ponet in contu chi est unu cantu traditzionale chi arribat dae sa civilidade pastorale e de sos massajos e chi at connotu mudaduras mannas in sas ùrtimas deghenas de annos, si si leat in cunsideru sa revolutzione acuntèssida in sos mèdios de comunicatzione e sas mudaduras econòmicas, sotziales e culturales mannas de custos annos, si podet nàrrere a seguru chi su cantu a tenore est biu e galu forte meda in paritzas comunidades sardas.
Abbaidende s’isparghinada de sos datos si podet notare chi su nùmeru de sos cantadores est che pare, in mèdia, a 39 cantadores/bidda, sa variàntzia de sos datos est bastante arta e sa deviatzione standard = ±45, cun puntas estremas de petzi 1 cantadore presente in unas cantas biddas e de prus de 200 in àteras, e custu obligat a meledare subra sas fainas chi tocat de inghitzare in su benidore dende tretu de prus a cussas comunidades in ue su cantu paret in dificultade prus manna pro neghe de su nùmeru minore de cantadores.
Su cuestionàriu propostu in unu Mòdulu de Google l’at cumpiladu, a oe, unu nùmeru mannu de cantadores: n° ischedas individuales cumpiladas 525. Custu campione est bastante mannu ca rapresentat su 15,8% de sa populatzione, est a nàrrere de sos cantadores censidos. Unu campionamentu chi peroe non s’est pòdidu ammaniare dae unu ghetu istatìsticu in manera curreta e coerente cun s’istrutura de sa populatzione: pro edade, pro traballu, pro tìtulu de istùdiu; ca su matessi sèberu de sa genia de intregada, cun mèdios informàticos, nche annanghet variàbiles non casuales chi annuddant in parte sa possibilidade de illarghiare su valore de sos datos essidos a campu a totu sa populatzione. Resurtat làdinu difatis chi benit mègius a impreare su traste informàticu dae banda de sas generatziones noas chi non dae banda de sos prus mannos; ateretantu si podet nàrrere pro su livellu de istrutzione chi tirat a un’ala sos resurtados cara a sos grados prus artos de custu etotu; su matessi acuntesset pro sos traballos de sos cantadores, sos pastores e pro su prus chie traballat in campagna tenet prus pagu ballassa cun sos mèdios informàticos e fintzas una timoria prus manna a dare informatzione online.
Postas in contu totu custas osservatziones de inghitzu, ma chi serbint, sos datos rapresentant semper e cando unu istrumentu de giudu pro s’acostiare a sa connoschèntzia de su mundu de su cantu a tenore ca frunit, semper pagu prus o mancu, unu cuadru vàrgiu e de interessu mannu e informatziones cantu mai ùtiles pro progetos benidores e pro fainas de acumprire a tales de dare una tutela ativa de su bene in ogetu.
Su cuestionàriu, in prus de frunire datos anagràficos de importu, informat su ruolu chi tenent sos cantadores in su tenore, s’adatamentu issoro, sos cuntestos de su cantu e sas funtziones chi nde sunt ligadas a issu, sas mudaduras diacrònicas, s’istadu de oe in die de sa pràtica, sa partecipatzione a grupos organizados e a ispetàculos, sa publicatzione de discos, s’acapiada intre cantu a tenore e traballu de su cantadore, sa cumpresèntzia in sa vida de sos cantadores de àteras formas musicales e poèticas traditzionales e nono, sa’impreu o nono de àteras mùsicas. Nointamas sos lìmites istatìsticos est semper e cando su prus traballu de balia de iscumproa, dae su ghetu cuantitativu, fatu finas a oe subra su cantu a tenore, de sa cantidade prus manna de datos chi siat istada mai regorta subra custu mundu.
Totu sos datos chi pertocant su censimentu de sa populatzione de sos cantadores, aunidu a cussos chi essint a campu dae sas ischedas de sos cuestionàrios, rapresentat una banca datos de balia ispantosa pro sa connoschèntzia de su bene, a disponimentu de sos istudiosos e de sos operadores culturales, ma prus che totu de giudu pro sos cantadores matessi, pro sa crèschida de s’atinu de su chi sunt faghendee pro s’impèllida a sighire su camminu peleosu de su cantu a tenore in su mundu modernu.
