Su Progetu
In limba sarda, Modas indicat sas paritzas espressadas locales chi sunt su piessinnu de su cantu a tenore. Sa punna manna de custu progetu est duncas de tutelare e favorèssere custa richesa de espressadas chi acàpiat su cantu e sos cantadores a sas comunidades issoro, chi nde sunt su sentidu prus fungudu.
Pro custu, Modas bolet istèrrere fainas de giudu dae cada ghetu e mirada pro s’amparu, s’istùdiu e sa promotzione de sa pràtica musicale: dae su censimentu de su cantu chi pertocat sa faina de istùdiu, sa documentatzione audiovisuale e sa chirca etnogràfica, a sa creatzione de una retza de su cantu a tenore, fintzas a nde torrare a recuperare e isvilupare sos cuntestos de sas funtziones traditzionales e su de nde tirare a cuss’ala sos giòvanos cun atòbios in sas comunidades issoro e cun atividades didàticas in sas iscolas. Totu fainas chi rechedint chi bi siat de manera direta sa presèntzia de sos cantadores pro nde favorèssere s’interatzione intre sas comunidades.
Cuastas paritzas fainas chi si bolent isvilupare in intro de su progetu sunt diferentes meda s’una cun s’àtera a tales de dare unu sèberu prus ampru chi agiudet sa chirca, sa valorizatzione e sa tutela de su cantu a tenore in sos cuntestos locales ue s’agatat custa pràtica, boghende a campu sa parte bona e traballende subra sas fartas o faddinas.
"Modas: Tutela e promotzione de sa pràtica de su cantu a Tenore respetende sas espressadas locales suas" est unu progetu de s’Istitutu Superiore Regionale Etnogràficu (ISRE) finantziadu cun sa L. 77/2006 de su Ministeru de sa Cultura. “Modas” naschet dae sa collaboratzione direta intre de s’ISRE e sos cantadores a tenore, rapresentados dae s’Associazione Tenores Sardegna, chi nde sortit 50 grupos de cantu a tenore e chi rapresentant 50 biddas, dae s’Associazione Boches a Tenore, chi nde sortit 25 grupos de cantu a tenore e chi rapresentant ateretantas 25 biddas diferentes, e dae s’Associazione CAMPOS, chi nde sortit 500 musicistas e cantadores de traditzione orale de Sardigna, intre de custos prus de 350 cantadores a tenore.
Responsàbile Tècnicu-Iscientìficu de su progetu: Diego Pani
Responsàbile Retza de su Cantu a Tenore: Sebastiano Pilosu
